Ultimate magazine theme for WordPress.

सरकारी निर्णय विपरीत पोखरिया नगरपालिकाको स्वास्थ्य शाखाले आयोजना गर्‍यो गोष्ठी

पोखरिया, ९ भदौ – पछिल्लो पटक पर्सा जिल्लामा समुदाय स्तरमा कोरोना फैलिएपछि साउन १९ गतेबाट अत्यावश्यक सेवा बाहेक सबै बन्द गरिएका छन् । विश्वव्यापी महामारीको रुपमा फैलिएको कोरोना भाइरस कोभिड १९ फैलिने त्रासमा अहिले फेरि मुलुक लगभग ठप्प नै छ ।

 

उपत्यकाका तीन जिल्लासहित देशभरका आधा भन्दा बढी जिल्लामा स्थानीय प्रशासनले निषेधाज्ञा लगाएको छ । अत्यावश्यक काम बाहेक अरु कामका लागि निषेधाज्ञा उल्लघंन गरिए संक्रामक रोग ऐन २०२० बमोजिम कारबाही गर्ने जनाएको छ । सरकारले घरभित्रै बसेर सुरक्षित हुन आग्रह गरिरहेको छ । यस्तो बेलामा कुनै सभा, गोष्ठी, सम्मेलन नगर्न भनेको छ । पछिल्लो पटकको मन्त्रिपरिषद्को निर्णयमा शैक्षिक संस्थाहरु अर्को निर्णय नभएसम्मका लागि बन्द रहने र विद्यालय, कलेज, ट्युसन सेन्टर खोल्न र सबै प्रकारका सभा, गोष्ठी, तालिम, सेमिनार गर्न पाइने छैन भन्ने उल्लेख छ ।

तर पर्साको पोखरिया नगरपालिकाले भने सरकारको यो निर्णयको उल्लघंन गर्दै गोष्ठी आयोजना गरेको छ । नगरपालिकाको स्वास्थ्य शाखाले आजबाट दुई दिने संक्रमण नियन्त्रण गोष्ठी शुरु गरेको छ । ब्यानरमा उल्लेख भए अनुसार आजबाट पोखरिया अस्पतालमा शुरु गरिएको सो गोष्ठी भोलिसम्म चल्ने छ ।

मन्त्रालयबाटै आएको परिपत्रको अवज्ञा गर्दै पोखरिया नगरपालिकाका स्वास्थ्य शाखा प्रमुख कौशलेन्द्र मिश्राले गोष्ठी शुरु गराएका छन् । पछिल्लो समयमा पोखरिया अस्पतालकै चिकित्सक, स्वास्थ्यकर्मी, कर्मचारी संक्रमित भई अस्पतालको सेवा समेत ठप्प भएको बेला र गाम्रीण क्षेत्रमा संक्रमण बढिरहेका बेला यसलाई बेवास्ता गर्दै स्वास्थ्य शाखाकै प्रमुख मिश्राले मानिसको ज्यानै जान सक्ने संक्रमण फैलाउने लापरवाही गरेका छन् ।

 

यति मात्र होइन, उनले आफ्नो उपल्लो निकायको निर्णयको पनि धज्जी उडाएका छन् । युनिसेफ नेपालको सोे कार्यक्रममा पूरानो कार्यक्रम रहेको र सो कार्यक्रमलार्ई जसोतसो सकेर भत्ता र बजेट कुम्ल्याउने दाउमा प्रमुख मिश्राले त्यस भेगका नागरिकको स्वास्थ्यमाथि खेलवाड गरेका छन् । हामीलाई प्राप्त तस्वीरमा एउटा सानो कागजको ब्यानर टाँसेर गोष्ठी गरिएको देखिन्छ । कार्यक्रममा सहभागी भएका व्यक्तिहरुले पनि कुनै सामाजिक दुरी कायम गरेको देखिदैंन । दुई/तीन जनाले त मास्क पनि लगाएका छैनन् ।

 

नगरपालिकाको स्वास्थ्य शाखाले नै यसरी सरकारी निर्णयको धज्जी उडाउनु र सचेतना फैलाउने जिम्मेवार निकायले नै यस्तो बेलामा गोष्ठीको आयोजना गर्नुले सो शाखा र प्रमुखको लापरवाही झल्किन्छ ।

त्यस्तै, आयोजना भएको सो संक्रमण नियन्त्रण गोष्ठीबाट कसैले पनि कुनै लाभ लिने सक्ने देखिदैंन । र संक्रमण फैलन नदिन सचेतनाका लागि गरिने यस्ता गोष्ठी अहिले भौतिक रुपमा उपस्थित भएर गरिनुपर्ने समय पनि होइन । दुई दिन आयोजना हुनुपर्ने गोष्ठी हतार-हतारमा केही मानिस भेला पारेर दश पन्ध्र मिनेट गरेर संक्रमण नियन्त्रणमा के फाइदा पुग्ला र ?

Total Page Visits: 202 - Today Page Visits: 1
Comments
Loading...