धनुषाको शहिदनगर नगरपालिकाका मेयर उदय बरबरियाले समाचार संकलन गरी घर फर्किने क्रममा पत्रकारद्धय शिबेन्द्र रोहिता र मनोज मोरबैतामाथि आक्रमण गर्न लगाएका छन् ।
शुक्रवार साँझ शहिदनगर नगरपालिकाको कोयलपुरमा पत्रकारद्धय रोहिता र मोरबैतामाथि आक्रमण भएको हो । मेयर बरबरियाले पालेका ४÷५ जना व्यक्तिले अचानक आएर लाठी प्रहार गर्न थालेपछि पत्रकार रोहिताको टाउँको फुटेको छ । पत्रकार मोरबैतालाई समेत कुटपिट गरेका छन् ।
उनी दुबै जनाको उपचारका लागि जनकपुर लगिएको छ । घाईते पत्रकार रोहिताले भने, ‘आज शहिद नगरले बनाएको क्वारेन्टाइनको रिपोर्टिङ गर्न पुगेका थिए । त्यहाँ बस्नेहरुको बेहाल छ । केहि सुविधा दिएको छैन । यस विषयमा मेयरसँग बुझ्न नगरपालिका गएका थिए । सोही निहुँमा लठैत पठाएर आक्रमण गर्न लगाए ।’
मेयर बरबरियाले आफुविरुद्ध पटक पटक समाचार लेखेको भन्दै यसअघि पत्रकार मोरबैतालाई धम्की दिन लगाएका थिए । गाउँपालिकामा व्यापक भ्रष्टाचार गरिरहेका मेयर बरबरियाको विषयमा पत्रकारद्धय रोहिता र मोरबैता पटक पटक समाचार बाहिर ल्याउँदै आएका छन् । सो कुरा सह्न नसकेपछि मेयर बरबरिया आक्रमणमा उत्रेका हुन् ।
