प्रभु यादव, कलैया ।। बाराको कलैया उपमहानगरपालिका २६ श्रीपुरको कलैया पिलुवा सडक खण्ड अन्तर्गत मङगलबार दिउँसो ट्रिपरको ठक्करबाट एक जना महिलाको घटना स्थलमा मृत्यु भएको र अर्को एक जना घाइते भएका छन् । ना ८ ख ३१२९ नम्बरको ट्रिपरले वीरगन्जबाट कलैया आउँदै गरेको ना १६ प ९७५७ नम्बरको मोटरसाइकलाई दिउँसो पौने १ बजेतिर ठक्कर दिएको हो ।
मुस्लिमहरुको महान पर्व ईद–उल–फित्र मनाउन आफ्नो घर आइरहँदा मोटरसाइकलमा सवार एक दामपतिलाई टिपरले ठक्कर दिएको हो । मृत्यु हुनेमा बाराको सिसवा महेशपुरकी ३५ वर्षीया खुश्बु नेशा खातुनको घटनास्थलमै मृत्यु भएको हो भने उनका श्रीमान ४० वर्षिय जाकिर हुसैन गम्भिर घाइते भएका छन् । घाइते हुसैनको उपचार कलैयाको कलैया अस्पतालमा भईरहेको छ ।
नवलपरासीको कावासोतीमा व्यापार गर्दै आएका दम्पति बुधबार परेको इदु–उल फित्र मनाउन मोटरसाइकलमा घर फर्किँदै गरेका बेला ट्रिपरले ठक्कर दिएको थियो । ट्रिपर र ट्रिपर चालक सुरेन्द्र पटेललाई प्रहरीले नियन्त्रणमा लिइसकेको छ । दुर्घटनालगत्तै स्थानीयले सडकमै मृतक खातुनको शव राखेर प्रदर्शन गर्दै सडक अवरुद्ध पारेका थिए ।
सडक अवरुद्ध भएपछि घटनास्थलमा पुगेका प्रहरी र स्थानीय प्रदर्शनकारी बीच भएको छलफलमा तत्कालका लागि कलैया पिलुवा सडकखण्ड ट्रिपर चल्न नदिने सहमति भएपछि अपरान्ह सवा ३ बजेदेखि सडक सूचारु भएको बाराका प्रहरी नायव उपरीक्षक रन्जित सिंह राठौरले जानकारी दिए।
Thank you for reading this post, don't forget to subscribe!
Comments are closed.