विराटनगर
वडा अध्यक्षसहित ९ जना समुहको कुटपिटबाट गम्भीर घाईते भएका विराटनगर-१४ निवासी समानन्द यादवको मृत्यु पश्चातपनि न्याय नपाएको छोरा राजेश यादवले बताएका छन ।
शनिबार विराटनगरमा आयोजित पत्रकार सम्मेलन बोल्दै उनले यस्तो बताएका हुन । २०७६ जेठ ३२ गते विराटनगर-१८ निवासी एक युवतीसँग आफ्नो विवाहको बिषयमा आयोजित एक पञ्चेतीमा कुरा नमिलेपछि आफ्नै बुवा समानन्द यादवसँग कुटपिट भएको छोरा राजेश यादवको भनाई छ ।
उनले जहदा गाउँपालिकाका वडा अध्यक्ष प्रदिप यादव, विराटनगर १८ का वडा अध्यक्ष सञ्जय शाह, विराटनगर १४ का वडा अध्यक्ष बलदेव यादव र उनका छोरा रबिन यादवसहित जहदा १ का दिनेश यादव, विराटनगर १८ का भोला यादव, विन्देश्वर यादव, विजय यादव, दिपेश यादव र विरेश यादव गरी जम्मा ९ लगायतको समुह कुटपिटमा संंलग्न भएको आरोप लगाएका छन ।
निर्घात कुटपिटबाट गम्भीर घाईते समानन्दको स्पाईनल कर्डको सि ३ देखि सि ६ सम्मको मेरुदण्डको हड्डी भाँचिएको थियो । मृतकका कान्छो छोरा मुकेश यादवले न्युरो अस्पताल विराटनगर, विराट नर्सिङ्ग होम, भारतको सिलिगुडी र नोबेल अस्पतालमा समेत उपचार सम्भव नभएपछि असार २६ गते कोशी अञ्चल अस्पतालको आकस्मिक कक्षमा आफ्नो बुवाको मृत्यु भएको बताए ।
कुटपिटको घटनामा संलग्न ९ जना विरुद्ध असार १ गते नै जि.प्र.का मोरङ्गमा कर्तव्य ज्यान मुद्दा अन्तर्गत किटानी जाहेरी दिँदा पनि हालसम्म कुनै सुनुवाई नभएको मृतकका आफन्तको भनाई छ । प्रहरीले हालसम्म कुटपिटमा संलग्न मुख्य अभियुक्त फरार रहेको बताउँदै आएपनि उनीहरु बारम्बार गाउँमा देखिने गरेको मृतककी श्रीमती कन्दुला देवीको भनाई छ । त्यस्तै घटनामा संलग्न सबै अभियुक्तहरु फरार रहेकाले उनीहरूको खोजीकार्य तीव्र गतिमा भईरहेको जिल्ला प्रहरी कार्यालय मोरङ्गका एस.पी विश्व अधिकारीले जानकारी दिए ।
घटनामा संलग्न अभियुक्त मध्येका तीन वडा अध्यक्षहरु भने विगत २ हप्तादेखि फरार छन ।
साभार-zen 1 न्यूज़ (शिवम मिश्रा)
