काठमाडौँ– महँगी र भ्रष्टाचारविरुद्ध ११ विद्यार्थी संगठनले प्रदर्शन गरेका छन् । विभिन्न ११ वटा विद्यार्थी संगठनहरुले नेकपाको सरकारविरुद्ध काठमाडौं तताएका छन् ।
नेकपाको सरकार भ्रष्ट र अधिनायकवाद भएको भन्दै संयुक्त ११ विद्यार्थी संगठनले काठमाडौंमा विरोध प्रदर्शन गरेका हुन् l भएको प्रदर्शन र सभामा उनीहरुले वर्तमान सरकारले भ्रष्टाचारलाई बढवा दिएको तथा महँगी नियन्त्रणमा चासो नदेखाएको भन्दै सरकारको चर्को आलोचना गरे । काठमाडौंको माइतीघर मण्डलामा भेला भएका उनीहरुले सरकारले समृद्ध नेपाल सुखी नेपाली भन्ने गरेपनि व्यवहार ठिक विपरित भइरहेको बताए ।
विद्यार्थीहरुको जुलुस माइतीघरबाट र्यालीसहित बानेश्वर पुगेर कोणसभामा परिणत भएको थियो । सभालाई सम्बोधन गर्दै थरुहट आन्दोलनका अगुवा नेता रेशम चौधरीलाई रिहा गर्न समेत उनीहरुले माग गरेको छ । सरकार गम्भीर नभए कडा आन्दोलनमा जाने विद्यार्थी संगठनहरुको चेतावनी छ ।
सार्वजनिक जग्गासमेत सत्तारुढ दलको नेताको नाममा हडप्ने काम गरिएको, मुलुकमा भ्रष्टाचार बढाएको, सरकारले नागरिकको अधिकार खोस्न खोजेको, हत्या, हिंसालगायतका घटना नियन्त्रण गर्न सरकारको ध्यान नगएको उनीहरूको आरोप छ ।
मधेशको माग, थरुहट आन्दोलनको माग, राजनीतिक आन्दोलनमा क्रियाशिल नेत्रविक्रम चन्द ‘विप्लव’ लगायतको विषयमा सरकारलाई गम्भीर हुन ध्यानाकर्षण गराएका छन् । उनीहरुले जायज राजनीतिक विषयलाई राजनीतिक तवरबाटै समाधान गर्न सरकारलाई खबरदारी समेत गरेको राविसंघका अध्यक्ष चिरञ्जीवि यादवले जनाए ।
